Nokrek Biosphere Reserve
Nokrek National Park Asanggre aro Sasatgregita re·angenchimode km 45 mang chel·ao donga, indiba na·a ja·achi re·na dona gong·gipa ong·ode, West Garo Hillsni Tura a·bri onide km 2 mang chel·aosan ong·a. Nokrek ian Garo Hills gimiko chubatgipa a·biding ong·a aro ia a·bidingko a·dokni forest departmentni ningo done National Biosphere ine parakaha. A·brini ning·tugipa burungrango bang·a nikna neng·gipa bolrang aro matburungrang donga. Ia parkara altue man·a ba nikna neng·gipa me·mang narangni, jeni miksonganin sigiming janggini narang ine ong·a, uani biap ong·a. Ia sandie man·anichi Nokreko 47 sq km ranggita apalgipa National Citrus Gene Sanctuary-cum-Biosphere Reserveko ong·ataha.
Bangbata Garo Hills a·jarangona jokanggipa chiring chibisikrang, Nokrek a·bidingoni ong·baa, uarangoni Simsang chibimaan niksengbatgipa aro dal·batgipa ong·a , jekon Bangladeshona jokannangahaon Someshwari ine minga, Bang·a matburang jekai mongma, matchapeng, kawate, huro, chipu nokma, ringek aro una agreba altue nikna neng·gipa balgitorangba ia biapo donga.
Tura Peak
Garo Hillni dal·batgipa songjinma Turani salaramchipak Tura a·bri donga.Tura jillako niwate donggipa ia a·bri sagalni leveloni 872 meter rang chua. Ia abriko skangode Dura inesa mingachim indiba Britishrangsa Tura ine mingna a·bachengataha aro ia a·briara dakgipa rugipani dongram nok ba biap ong·a ineba bebera·a.
Tourist Bungalow, Niwate rona tarigipa biap aro chinchona bagan ia Tura peako donga. A·bri ku·chotoni, Brahmaputra a·kaweko aro Bangladeshni rimitchipchipgipa apatalko bilsi a·najoljolan nikna gita man·a.
Britishrangni sason ka·ani somoio, Garo Hillsni Deputy Commissionerara a·brini kosako nok rike dongipao dingkari mittingo donga aro uanoni mongmani kosako gadoe Turaona salantian ong·onbaa. Deputy Commissionerni ja·achi re·na tarigipa ramako da·ona kingkingba nikna gita man·kuenga. Ia ramaan Tura abriona doanggiparangna altue re·na donan gita dakchakaniko on·enga.
Pelga Falls
Pelga dare Turaoni Km 7 mang chel·ao donga, aro ia biap batanggimin bilsirango na·tok milsi pe·giparangni aro picnic na re·giparangni namnikgipa biap ong·a. Tourism ia biapo ja·achi re·ani rama aro niwate roani biaprangko tarie namdapataniko dakaha. Ganol chiring kosako A·chikrangni jatni dakrongbewalo wa·ani ja·langko rikanichi ia biapo mingsa nitodapataniko on·a.
Wadagokgre
Songre songgabadgipa manderang, jemangan itihasni na gisik nanggiparang ong·a, uamang Wadagokgre, jean West Garo Hills Districtni ge·sa gisik nangatgipa biap ong·a uko re·ange niena gita man·en. Archeological Survey of Indiani pre-history branch ia biapo a·arangko konge ba cho·e sandie nianirangko dakaha aro ia biapara toromni gita mongsonggipa dal·gipa songjinma ong·a ine uina man·aha. Ia Wadagokgre biapara Turaoni 75 kmrangni gita chel·ao donga. Bhaitbari jean Wadagokgreoni km 4 chel·ao donga, uano PWD ni inspection bungalow ge·sa gnang.
Sasatgre
West Garo Hills Districtni ning·o, Nokrek abidingni jareko donggipa Sasatgre song ona Tura Asanangre aro Williamnagar State highwayo donggipa Oragitok songoni jeep garichi re·na mangipa ramagita re·angna man·a.
Kolima rangko bagan bari dakani bidingo Sasatgre ian patian gapgipa biap ong·a aro ia songko simdime silgipa komila baganrangchi duula. Ia song da·ode Nokrek Gene Sanctuary cum Biosphere Reserve ni wilwilao donga.
Chibragre
Chibragre ian Ganol aro Rongram chiring jolgni gisepo dongipa, nina nitobegipa biap, jean manderangni na·tok milsi pe·na aro a·palona re·e cha·ani ringanirangko dakgiparangni namnikbatgipa biap ong·a. Ganol chiring, Nokrek a·bri kuchotoni jokonbae, salaramchipakna jokanga, aro ia chiring ambi atchuni aganritingbagipa Sangkni aro na·nil rangni dongchakram nok ong·a ineba bebe ra·a. Ia chiringrangni warirangko duule dal·dalgipa rongbrakrang aro ning·tugipa rongkolrangba donga.
Rombagre
Rombagre Turaoni km 35 mang chel·ao, Williamngar Tura PWD rama samo donga. Simsang chibimao nitobegipa chi wari donga jekon songni manderang kangeming simsake rakie dona aro ia grikbegipa chio na·tokrangni tok dake jinma jroe roako nikna man·a aro indaken banga songre songabadgiparangna ia a·kange dongimin wario na·tokrangni jroako nie kusi ong·aniko nikna man·a. Iana agreba, Rombagreni sepangjolo bang·a an·senge rona namgipa biaprangba donga jeonan chel·a aro sepango donggipa manderang bilsikarini gita an·senge rona re·anga.