Itihas

West Garo Hills district a·dokni dalbatgipa districtrangni gisepo ge·sa ong·a aro Meghalaya a·dokni saliramchipak donga. Garo Hills districtko 1976 bilsini October jao ge·gni district dake bakaha, jekai West Garo Hills district aro East Garo Hills district. Apsandake 1992 bilsini June jao skangni West Garo Hills districtko aro ge·gni administrative district- West aro South Garo Hills dake bakko daktaiaha.West Garo Hills districtni skotong song Tura ong·a jean a·doko Shillong ni ja·man gnigipa dal·batgipa jilla ong·a.

Biapni gimin janapani

West Garo Hills District Meghalaya a·dokni saliramo donga jean salaramchipak East Garo Hills, salgipengchipak South Garo hills, Salgrochipak aro Salgro saliramchipak Assamni Goalpara District aro Salgipengo Bangladesh A·songchi dongdulako man·a.

Ia District 90⁰30 aro 89⁰40 E Latitude aro 26⁰ aro 25⁰20 N Longitudeni gisepo donga.

West Garo hills district- o bang·bate A·Chik jatrangni songdonganiko nikna man·gen, A·chikrang ma·ani chatchiko ra·gipa Tibeto Burman ma·chongni Bodo family/ dol ni jat ma·sa ong·a. uamangna Agreba a·brini chonchongipa jatrang jekai Hajong, Rabha, Koch, Rajbansi, Meches, Kachari aro Dalu jatrangni songdonganikoba ia Districto nikna man·a. unbaksana India-ni gipin Biap ba a·dokni manderang jekai, Bengali, Assamese, Nepali, Marwari, Hihari, aro gipinrangkoba ia districto songdongpaaniko nikna man·a.

Biapni gunrang

A·bidingrang:

West Garo Hills district ni biaprang bang·batan A·briarigipa ong·an baksana salgrochipak aro salgipeng- saliram jolrango a·kawerang gnanggipa biapba ong·a. Garo hills o mongsonggipa damgittam A·bidingrang donga.

Tura A·biding/ Tura Range :

Ian ge·sa West Garo Hillsni mongsonggipa A·biding ong·a. Tura range/ a·biding 50 km mang ro·a aro Tura oni Salaramoni Salgipengchina an·pae South Garo Hills-ni Sijuona joljol dakjoljolanga. Ia A·bidingni chu·batgipa A·kimbri rangara Tura Peak, Nokrek Peak, Me·minram Peak, Nengminjok Peak aro Chitmang Peak ong·a. Iarangoni chubatgipa a·kimbri Nokrek A·bri (1412m) ong·a jean Turaoni salgipeng- salaramo 13 km chel·ao donga.

Da·o dipet Tura A·biding gimikko Nokrek National Park ni ning·o nirok simsakaniko dakenga. Ia a·bidingrangni Burung Bolgrimrangko aro chiring Chibisikrangko Garo Hills-o British-rangni Sason ka·miting somoirangonin ripinge donaniko dakenga. Ia biaprango manderang songdongjani gimin sam bolrangna aro matburungrangna namgipa dongchakaniko on·a.

Arbella A·biding/Arbella range :

Arbela Metre 999 Chugipa a·bri ong·a. ia a·bri Asananggre songni salgrochipak Tura Guwahati ramao donga. Ia a·bidingni bang·bata bakrang East Garo Hills District ni a·jao ga·aka. Uni gimin bang·gija mitam bakrangkosan West garo Hillso nikna man·a.

Ranggira A·biding :

Ia A·biding Districtni Saliramchipak an·pachake Halidayganj Songo bon·ea. Ian 673 metre mang chugipa a·bri ong·a.

Chibimarang

Tura A·biding West Garo Hillsni bang·a Chiring Chibisikrangni ong·katram biap ong·a jeonin Chibimarang a·bachenge salgipengchipak Bangladesh ni a·kawerangona jokanga aro Brahmaputrani A.kawerangona salgro aro saliramchipak mikkange jokanga. Salgrochipak jokanggipa mongsonggipa chibimarang kalu, Ringgi aro Didak ong·a. salgipengchina jokanggipa mongsonggipa chibimarang Bhogai, Dareng aro gipinrang ong·a. Iana agreba Tura A·biding Simsang ( Someswari) Chibimani bisikba ong·a, Jean Meghalaya A·dokni mongsonggipa chibima ong·an baksa South Garo Hills-ni mongsonggipa biaprangko ong·ata.

Jinjiram:

Ia chibima Derek Songoni Ong·baa aro uni mongsonggipa bipekara Upot Chiboloni a·bachenga. Ia Chibima Salaramchina jokbae Gagua Chibima baksa nangdimea , indake Goalpara Districtni arijoljol Phulbari chipak jokbae Halidayganjona sokbae Goalpara Districto napea. Ian Garo Hills O Robatgipa Chibima Ong·a.

Kalu:

Ia Chibimako A·chikrang Ganol Minga. Ia chibima Tura A·brioni jokbae Saliramchipakna Damalgre, Garobadha aro rangapani songrangko jokpakange Goalpara Districto na jokanga. Ia chibimani mongsonggipa bipekrang dilni aro rongram ong·a.

Didak:

Ia chibima Anogreoni a·bachenge Garo Hillsni biaprangko jokpakange goalpara Districtona jokanga.

Bogai:

Ia chibimako Bugi ineba minga. Ia Chibima Nokrek a·brini Salgipengchipakni a·bachenge Dalu song gita jokpakange Bangladesh-ni Mymensingh District-ona jokanga.

Rongai:

Ia Chibima Arbela a·brioni a·bachenge Ringgegre songgita jokange Jinjiram chibimao braea. Ia chibimako Ringgi Chibima ineba minga.

Dareng ba Nitai :

Ian Nokrek A·brini salgipengchipakni a·bachenga. Ua Salgipengchipakna silkigre gita jokange Bangladeshona jokanga. Ia chibimako uni mongsinggipa warirang jekai Warima, rongang, Bamon aro gipinrang uarangoni bamon warian Tu·batgipa ong·a. Ia chibimani mongsonggipa bipekrang Kakija, Daji aro rompa ong·a.