A·chikrangni bang·bata manianiranga aro daka rikanirang ge·e game cha·anio pangchake maniarang ong·bata. Ua maniarangoni ‘Wangala’ an mongsonggipa maniani ong·a, jekon mi misko ratman tetmanani ja·mano patigipa ra·rongipa Misi Saljongko mitepilskaani gita maniani ong·a. Ia manianiko dakna dingtangmancha manchie dongimin sal aro tarikrang dongja, aro song damsa oni damgipinona ia maniani sal aro tarikrang dingtanggrika indiba ia maniako october ba November jani gisepo manironga. Ia maniarangko dakna songni ba a·kingni Nokmarang jako ra·e ka·dilronga. Manianiko a·bachengna skang bang·a cha·anirangko aro chu bitchirangko song·e donsamsoa. Ia manianio mia me·a aro me·chikrang uamangni dingtang dingtang rongrangni ganding chindingrangko gane riting riting dake dama, rang-rangko dokanaaro adilko sikana chro chro ja·ku apsan de·e chrokanian an·sengbatgipa aro nina nitogipa bak ong·a.
Una agreba, Ajema roa, Mi su·a, Chambil moa, Do·kru sua, Kambe toa, Galwang roa, Napsepgrika aro gipin chrokanirangkoba ia maniao chrok mesaaniko dakronga.
